سورۃ نوح
بِسْمِ اللّٰهِ الرَّحْمَٰنِ الرَّحِيمِ
بے شک ہم نے نوح کو اس کی قوم کی طرف بھیجا کہ اپنی قوم کو ڈر سنا اس سے پہلے کہ ان پر دردناک عذاب آئے■1
اس نے کہا اے میری قوم! میں تمہیں صاف ڈرانے والا ہوں■2
کہ تم الله کی عبادت کرو اور اس سے ڈرو اور میرا کہنا مانو■3
تاکہ وہ تمہارے گناہ معاف کرے اور تمہیں ایک وقت مقرر تک مہلت دے بے شک جب الله کا وقت آتا ہے تو وہ ٹلتا نہیں اگر تم سمجھو■4
کہا اے میرے رب! میں نے اپنی قوم کو رات دن بلایا■5
پس انہیں میرے بلانے سے بھاگنے کے سوا کچھ زیادہ نہ ہوا■6
اور بے شک میں نے جب کبھی انہیں بلایا تاکہ تو انہیں معاف کرے تو انہوں نے اپنی انگلیاں اپنے کانوں میں دیں اور اپنے کپڑے اوڑھ لیے اور اڑ گئے اور بڑا غرور کیا■7
پھر میں نے انہیں بلند آواز سے پکارا■8
پھر میں نے انہیں پکارا ظاہری طور پر اور پوشیدہ طور پر■9
پھر میں نے کہا اپنے رب سے معافی مانگو بے شک وہ بڑا معاف کرنے والا ہے■10
وہ تم پر آسمان کو خوب برسنے والا بھیجے گا■11
اور مال اور بیٹے تمہارے زیادہ کرے گا اور تمہارے لیے باغ بنا دے گا اور تمہارے لیے نہریں بنا دے گا■12
تمہیں کیا ہوا ہے کہ الله کی عظمت کا تمہیں کچھ خیال نہیں■13
حالانکہ اس نے تمہیں کئی طرح سے بنایا■14
کیا تم نے نہیں دیکھا کہ الله نے کس طرح سات آسمان اوپر تلے بنائے■15
اور ان میں چاند کو روشنی بنایا اور سورج کو چراغ بنایا■16
اور الله ہی نے تمہیں زمین سے عجیب طرح اگایا■17
پھر وہ تمہیں اسی میں واپس لے جائے گا اور تمہیں دوبارہ اسی سے نکالے گا■18
اور الله نے تمہارے لیے زمین کو فرش بنایا■19
تاکہ تم اس کے کشادہ راستوں میں چلو■20
نوح نے کہا اے میرے رب! انہوں نے میری نافرمانی کی اور اس کی فرمانبرداری کی جس کا مال اور اولاد اس کے لیے نقصان ہی بڑھایا■21
اور بڑا فریب کیا■22
اور کہا ہرگز اپنے معبودوں کو نہ چھوڑو اور نہ ہی ودّ اور سواع اور یغوث اور یعوق اور نسر کو چھوڑو■23
اور انہوں نے بہتوں کو گمراہ کیا اور (تو بھی) ان ظالموں کی گمراہی ہی بڑھا■24
پھر اپنی خطاؤں کے باعث وہ غرق کر دیے گئے پھر آگ میں ڈال دیے گئے پھر اپنے لیے الله کے سوا کوئی مددگار نہ پایا■25
اور نوح نے کہا کہ اے میرے رب! زمین پر کافروں میں سے ایک بھی بسنے والا نہ چھوڑ■26
بے شک اگر تو انہیں چھوڑ دے گا تو وہ تیرے بندوں کو گمراہ کر دیں گے اور ان کی اولاد نافرمان اور سخت کافر ہو گی■27
اے میرے رب! مجھے اور میرے ماں باپ کو اور جو ایمان دار ہو کر میرے گھر میں داخل ہو اور سب ایمان دار مردوں اور سب ایمان دار عورتوں کو معاف فرما اور کافروں کو سوائے ہلاکت کے اور کچھ نہ بڑھا■28
©
Translation: Fateh Mohammad Jalandhri
This translation is copyright free and free of any restrictions