سورۃ المزمل
بِسْمِ اللّٰهِ الرَّحْمَٰنِ الرَّحِيمِ
اے کپڑا اوڑھنے والے■1
رات میں قیام کرو مگر تھوڑی■2
آدھی رات یا اس سے کچھ کم کرو■3
یا اس سے زیادہ کرو اور قرآن کو ٹھہر ٹھہر کر پڑھو■4
بے شک ہم تم پر ایک بھاری بات ڈالنے والے ہیں■5
بے شک رات کا اٹھنا نفس کو روندنے والا ہے اور کلام کو درست کرنے والا ہے■6
بے شک دن میں تمہارے لیے بہت مصروفیت ہے■7
اور اپنے رب کے نام کو یاد کرو اور سب سے کٹ کر اسی کی طرف جاؤ■8
وہ مشرق و مغرب کا رب ہے اس کے سوا کوئی معبود نہیں پس تم اسے اپنا کارساز بناؤ■9
اور جو کچھ یہ لوگ کہتے ہیں اس پر صبر کرو اور انہیں خوبصورتی سے الگ کردو■10
اور مجھے اور ان جھٹلانے والے مالداروں کو چھوڑ دو اور انہیں تھوڑی سی مہلت دو■11
بے شک ہمارے پاس بھاری بیڑیاں اور دوزخ ہے■12
اور گلے میں پھنسنے والا کھانا اور دردناک عذاب ہے■13
جس دن زمین اور پہاڑ کانپ اٹھیں گے اور پہاڑ ریت کے تودے ہو جائیں گے■14
بے شک ہم نے تمہارے پاس ایک رسول گواہ بنا کر بھیجا ہے جیسے ہم نے فرعون کی طرف ایک رسول بھیجا تھا■15
پس فرعون نے اس رسول کی نافرمانی کی تو ہم نے اسے سختی سے پکڑ لیا■16
پس اگر تم کفر کرو گے تو تم کس طرح بچو گے اس دن سے جو بچوں کو بوڑھا کر دے گا■17
جس دن آسمان پھٹ جائے گا اس کا وعدہ ضرور ہو کر رہنے والا ہے■18
بے شک یہ ایک نصیحت ہے پس جو چاہے اپنے رب کی طرف جانے والا راستہ اختیار کرے■19
بے شک تمہارا رب جانتا ہے کہ تم اور تمہارے ساتھ کے کچھ لوگ دو تہائی رات کے قریب یا آدھی رات یا اس سے کچھ کم قیام کرتے ہو اور اللہ رات اور دن کا اندازہ رکھتا ہے وہ جانتا ہے کہ تم اس کو نباہ نہ سکو گے پس اس نے تم پر مہربانی کی پس جتنا آسانی سے قرآن پڑھ سکو پڑھو وہ جانتا ہے کہ تم میں کچھ بیمار ہوں گے اور کچھ دوسرے اللہ کی فضل تلاش کریں گے اور کچھ اور لوگ اللہ کی راہ میں لڑیں گے پس جتنا قرآن آسانی سے پڑھ سکو پڑھو اور نماز قائم کرو اور زکوة دو اور اللہ کو قرض حسنہ دو اور اپنے لیے جو نیکی آگے بھیجو گے اس کو اللہ کے پاس بہتر اور زیادہ ثواب والا پاؤ گے اور اللہ سے بخشش مانگو بے شک اللہ بخشنے والا مہربان ہے■20
©
Translation: Fateh Mohammad Jalandhri
This translation is copyright free and free of any restrictions.